வத்சலா, ஏ வத்சலா

 வத்சலா, ஏ  வத்சலா

இது என்னடா இது புது தினுசில் ஏதோ கிளம்புகிறதே என்று குழம்புகிறீர்களா,அமைதி, அமைதி  ஆசுவாசப்படுத்திக்கொள்ளுங்கள் . யாருமில்லை ஆமாம் கோயில் பிராகாரத்தில் யாருமில்லை ; நம்ம கழுகு தான் ஒரு மாமியை பெயர் சொல்லிக்கூப்பிட்டுக்கொண்டே ஓட , ஏதோ பேராபத்து என்பதை போல அந்த மாமி ஓட , ராமசாமி [கழுகு] தேவஸ்த்தான பிரசாத ஸ்டால் கம்பத்தடியில் அவளை நிறுத்தி "ஏன் இப்படி ஓடற ? நான் என்ன உன்கிட்ட வட்டியா வசூல் பண்ண வரேன் என்று மேலும் மிரட்ட மாமிக்கு வியர்த்துக்கொட்டியது.

அது சரி நீ வத்சலா தானே என்று ஆரம்பக்கேள்வியை போட , மாமி லேசாக தலை அசைத்தாள்; அதாவது ஆமாம் என்றோ இல்லை என்றோ வைத்துக்கொள் என்பது போல. நேக்குத்தெரியும் நீ வத்சலாவே தான் [ வரதாச்சாரி பேத்தி தானே ? உண்மையை சொல் என்று குரலை உயர்த்த, மாமி அசருவதாக இல்லை. நீங்களா எதையாவது சொன்னா எப்படி ? என்று தப்பிக்கப்பார்த்தாள்.] 

“இத  பாரு, உன் மூக்கு மேல இருக்கற வறுத்த மணத்தக்காளி வேறு யாருக்கு இந்த பூலோகத்திலே இருக்கு?   இந்த TRADE MARK க்கு க்காக உன் பின்னாலயே அலைஞ்சு திரிஞ்ச பசங்க இப்பவும் இருக்கான், நீ வேணும்னா கேட்டுப்பார் . அதிருக்கட்டும் நீ எப்ப வந்த?உங்க அம்மா- அதான் கமலா சௌக்கியமா? . அவாளை நான் ரொம்ப விசாரிச்சேன் னு சொல்லு" என்றது கழுகு. சற்றே பயம் விலகியவளாக, ‘நீங்க யாருன்னே தெரியலயே’ என்றாள் வத்சலா. “ரயில்வே ராமசாமி னு சொல்லு எல்லாருக்கும் தெரியும்; இல்லேன்னா கீழ சித்திரை வீதினு சொல்லு புரியும்”. “சாரி மாமா எனக்கு தெரியல்ல அதான் ஒடிடலாம்னு பார்த்தேன் “  என்றாள். என்கிட்டேர்ந்து தப்பிக்கமுடியுமா என்று வெற்றி புன்னகையுடன் நன்றாக சிரித்தார். ஆமாம் கழுகுக்கு பல் வலி சரியாகிவிட்டது.

ஒரு வழியாக கழுகு, வத்சலா வை போக விட்டது . கழுகுக்கு அவள் வீடு தெரியாதா என்ன அப்புறம் போய் ஒரு காபியை [அவர்கள் வீட்டில் தான்]  கவனித்துவிடும்.

கழுகு, வீட்டுக்குள் [6.10 PM] நுழைய --அம்புஜத்தின் குரல் 'பிராகாரத்தில் என்ன ஓட்டம் -அதுவும் வத்சலாவைத்துரத்திக்கொண்டு? கழுகு ரொம்ப சாவதானமாக யார் ஓட்டம், என்ன வத்சலா? என்று நழுவப்பார்க்க, அம்புஜம் "தெரியும் பூக்கார கோவிந்தசாமி புட்டுப்புட்டு வெச்சுட்டார். "நம்ப சாமி வத்தசலா அம்மாவை பேர் சொல்லி கூப்பிட்டுக்கிட்டு கருடன் சன்னதி நடையிலே ஓடிக்கிட்டிருந்தார்" யாரு வத்சலா ? என்றேன், பூக்காரர் சொன்னார் “அதாம்மா உத்தர வீதி பாட்டு வாத்தியார் வீட்டு மக "

இதான் இவ்வளவு தெரிஞ்சிருக்கு -என்ன கேட்டா ? என்று கழுகு எதிர் கேள்வி போட, அது சரி -அன்னிக்கு, சித்ர  வீதி  பெண்களை தெரியும் னு ஜம்பமா சொல்லிட்டு, இது ஏதோ உத்தர வீதியாம் -ஒரு வீதி பாக்கி இல்ல -பிரதாபம் ரொம்ப ஜாஸ்தியா இருக்கு. அதுக்காக ஓடணுமா கோவில் முழுக்க?

விட்டுட்டா பிடிக்கமுடியாது என்றது கழுகு. இன்னும் என்ன -இதெல்லாம் நன்னாவே இல்ல என்றாள்  அம்புஜம். 'கழுகின்' மின்னல் வேகம், அவர் செயல்களை தவறாக காட்டுவதைப்பற்றி, கழுகு கவலைப்படுவதில்லை. “ ச்சீ அவ வரதாச்சாரி பேத்தி ஏதாவது ஒளராத என்று கழுகு மடக்கிவிட்டு, ஒனக்கு பழைய friends நா என்னனு தெரியாது அதான் இப்பிடி கத்தற” என்று சொல்லிவிட்டு வரட்டும் கோவிந்தசாமி என்று கறுவியது கழுகு. கோவிந்தசாமிக்கு அஷ்டமத்துல சனி . வேறு என்ன சொல்ல.                                                                        இன்னும் கூட அம்புஜத்திற்கு 'கழுகை'ப்பற்றிய புரிதல் முழுமையானதல்ல. 

பேரா . ராமன்