SALEM SUNDARI -5

 SALEM SUNDARI -5

சேலம் சுந்தரி-5

இப்போது நிஜமாகவே "அலைபாயுதே" நிலை தான் ஊத்துக்காடு வெங்கட சுப்பையரின் பாடலில் வரும் "கண்கள் இரண்டும் ஒரு விதமாய் சொருகுதே" என்ற வர்ணனை போலவே  சுந்தரியின் கண்கள் ஒரு விதமாய்சொருகவே , அவள் துவண்டு சரிந்தாள் இருப்பிடத்திலேயே. நொடிப்போதில் இதை கண்ட மாடசாமி , மேடம், சுந்தரி மேடம் என்று அலறியபடி ஓடி அவளை தாங்கிப்பிடித்தார். அடிபட்ட குருவிபோல மாடசாமியின் மீது துவண்டு ஈரத்துணி போல் கிடந்தாள்; வினாடியும் தாமதமின்றி தண்ணீர் பாட்டிலை எடுத்து குளிர்ந்த நீரை சுந்தரியின் மீது மழைத்துளி போல் 3, 4 முறை தெளிக்க , சுந்தரி மயக்கம் நீங்கி கண் திறக்க அவளுக்கு வெட்கமும் பயமும் ஒருசேர ஆட்கொள்ள உடல் நடுங்கியது. "என்னம்மா இப்பிடி உடல் உதறுது , காலைல சாப்பிடாம வந்துட்டீங்களா, ஏய் பரமசிவம் டக்குனு ஓடிப்போய் சூடா காப்பி வாங்கிட்டு ஓடியா எங்கயும் பேசிக்கிட்டு நிக்காம ம்ம் ஓடியா என்று பரமசிவத்தை துரத்தினார். பரம சிவம் போற போக்கிலேயே flask ஐ த்தூக்கிக்கொண்டு காண்டீனில் பாய்ந்து 3 காபி சூடாக வாங்கி வந்தான். மாடசாமியே ஒரு கிளாஸ் டம்பளரில் ஊற்றி, “இந்தாங்க சூடா சாப்பிடுங்க , படபடப்பு அடங்கட்டும் அப்புறம்  டாக்டர்ட்ட போயிட்டு வந்துருவோம். இப்ப காப்பிய குடிங்க” என்றார்.

உள்ளூர ஒரு பயம் –மாடசாமி வேலைக்கு வாராமல் திரிவதாக நினைத்துக்கொண்டு HR வரை போனது ஹிமாலயத்தவாறு என்று உணர்ந்தாள். எப்படிப்பேசி விளக்குவது ;அதுவும் மிக அருகில் மாடசாமியின் உருவம் சற்று கலக்கம் தந்தது .இவ்வளவு பெரிய ஆம்பிளை மீது விழுந்து கிடந்தேனே , கம்ப்ளெயிண்ட் பண்ணிட்டு என் மேலயே சாஞ்சுக்கிறாயா நீ என்று மொத்தினால் என்னாகும் என்று சஞ்சலப்பட்டாள் . இன்னமும் மாடசாமி பக்கத்திலே தான் நிற்கிறார்.  

“சாரி சார் தவறு நடந்துடுச்சு-ஒரு தடுமாற்றத்தில” என்று சுந்தரி பேச ஆரம்பித்ததும், ‘இப்ப ஒண்ணும் சொல்லவேண்டாம்’ என்றார்  மாடசாமி .

[ஏய் , செய்யறதையும் செஞ்சுட்டு விளக்கம் சொல்லவேண்டாம்.]

[இப்பஒண்ணும் சொல்லவேண்டாம் என்றால் அதுதான் போலிருக்கிறது என்று நடுங்கினாள் சுந்தரி]  அதனால் லேசாக படபடத்தாள் ,கை நடுங்கியது. ‘.சார் தவறு செஞ்சுட்டேன் ஒருவித தடுமாற்றத்தில்’ என்றாள்  சுந்தரி.

தன்மீது மயங்கி சரிந்ததைத்தான் 'தடுமாற்றத்தில ' என்று சொல்வதாக மாடசாமி நினைக்க, அவளோ "தடுமாற்றத்தில் " என்று சொல்லி HR வரை போய் புகார் கொடுத்ததை பூசி மெழுகி -'ஒரு மாதிரி' சொல்லப்பார்க்கிறாள்.

இப்ப ஒண்ணும் சொல்லவேண்டாம் என்ற  மாடசாமி . சொல்ல விரும்பியது, நீயோ பசியில் துவண்டு வெடவெடக்கிறாய் இப்ப ஒண்ணும் சொல்ல வேண்டாம் [பிறகு பேசு என்று சொல்கிறார்].  மாடசாமி புரிந்துகொண்ட தடுமாற்றம் -பசிமயக்கம் விளைவித்தது என்று இரக்கப்பட்டார்.

சுந்தரி - அவராக ஏன் HR வரை போனாய் ? என்று கேட்கும் முன் பதற்றத்தில் தவறு செய்து விட்டேன் என்று சொல்லி சமாளிக்க நினைக்கிறாள்.

மாடசாமியின் உருவம் யாரையும் அசைத்துவிடும். அதுவும் இவ்வளவு அருகில் ஆஜானு பாகு அய்யனார் மீசை கர்லாக்கட்டை புஜங்கள்என்று மனம் நடுங்கும் கம்பீர வடிவம் , காலில் விழுவதைத்தவிர வேறு எப்படி தப்பிக்க முடியும் என்று யோசித்தாள் . இன்னொரு காபி குடியுங்க என்று இன்னும் காபியை கொடுத்தார் மாடசாமி. இப்போது கொஞ்சம் சமநிலை க்கு வந்தாள் சுந்தரி.

‘சார் போயிட்டு வந்துர்றேன்’” என்று சுப்புரத்தினத்திடம் சொல்லி விட்டு ஹெல்மெட் அணிந்து கொண்டார் மாடசாமி, சுந்தரி தன் டேபிள் அருகில் இருந்தாள் , ‘கிளம்பும்மா’ என்று மாடசாமி அவளை அழைத்துக்கொண்டு கீழே இறங்கினார்.

தொடரும்

அன்பன் ராமன்