SONG FOR SONGSTER ‘PATTU’

 SONG FOR SONGSTER ‘PATTU’            

பாட்டு "பட்டு ஐயங்காரு"க்கு பாட்டு

இது என்ன ஏதோ விடுகதை போல் என்கிறீர்களா ? இது நான் விடும் கதை தானே ஒழிய விடுகதை அல்ல . சரி, இது என்ன பாட்டு?  பாட்டு தானே பட்டு அய்யங்காரை பாட்டுப்பாட தூண்டி விட்டு, பின்னர் பாட்டு வாங்க வைத்தது.. அதற்கு பட்டு காரணமா பாட்டு காரணமா என்று விவாதம் வைத்தால் கூட வேடிக்கை பார்க்க பலர் தயார்.  பட்டு என்ற பட்டாபிக்கு , ஒரு பட வாய்ப்பு என்ற எண்ணமே பட்டாபிஷேகம் போல் குதூகலம் கொள்ள வைத்தது-- திருப்பதி என்ற பரிச்சயம் தான். என்னவோ தெரியவில்லை “அவளுக்கென்று ஓர் மனம்” படத்தில்   'எல்லோரும் பார்க்க' என்ற பாடலில்  சரணத்தில் இரண்டு வரிகள்

'கண்ணா நீ யாரோ என்றேன் '

விதி என்னும் தேவன் விளையாட வந்தேன் என்றான்" 

என்று கண்ணதாசன் எழுதியுள்ளார்.

பட்டுவுக்கு அது தெரியாது , ஆனால் எனக்கு அது மனதில் ரீங்காரம் செய்கிறது. . 

சரி, கதை எழுதுவதாகச்சொல்லிவிட்டு எங்கெங்கோ சஞ்சரிக்கிறாய் என்றொருவர் முறைக்கிறார். தொடர்ந்து படியுங்கள் புரியும்.

காலை மணி 4.30, கையில் ஒரு குச்சி யுடன் பட்டு தன் மனைவியை தட்டி தட்டி எழுப்புகிறார் , ம் எழுந்திரு மணி ஆச்சு --ம்ம், என்று துரிதப்படுத்துகிறார்.

அதுக்காக ஆடு மாடு  மாதிரி குச்சியால் தட்டி கூப்பிடணுமா? -வஞ்சுளம் .

நான் தீர்த்தமாடியாச்சு  -இது பட்டு

அதுனால யாருமே தூங்கக்கூடாதா ? இது என்ன அட்டூழியம்? இப்ப எந்த ஆபீஸ் ல உத்யோகம்? சும்மா அக்கடான்னு மூலைல உக்காராம என்று பொங்கினாள் வஞ்சுளம் .

இன்னிக்கு அமாவாசை -தர்ப்பணம் பண்ணனும் அதுதான் எழுப்பினேன் என்று மூக்கால் முணு முணுத்தார் 

ஆமாம் இப்ப நாலேமுக்காலுக்கா தர்ப்பணம் ? ஏழு மணிக்கு மேல தானே ஏன் இப்பிடி தொந்தரவு பண்றேள் . வரவர தொல்லைதாங்கல .

எழுந்து அள்ளி  முடிந்து  தலையை கோடாலி முடிச்சு போட்டுக்கொண்டாள் , இருங்கோ கோலம் போட்டுட்டு , பல் தேய்த்துவிட்டு வரேன் என்று எச்சரிக்கை மணி ஒலித்தாள் . அதிகாலையில் பட்டுவுக்கு சற்று புத்தி மட்டு , இன்னும் காபி வேறு முடியவில்லை , அதனால்  இருங்கோ கோலம் போட்டுட்டு , பல் தேய்த்துவிட்டு வரேன் என்ற dynamic warning புரியவில்லை பட்டுவுக்கு , ஏதோ காபி வரப்போகிறதென்று "ஆழி மழைக்கண்ணா" என்று  முணு முணுத்தார் . சொன்னபடி வஞ்சுளம் 10 நிமிடங்களில் வந்தாள் , வந்தவள் கண்ணில் பத்திரகாளி  தெரிகிறாள் .

தொடரும்

அன்பன் ராமன்